بشره جميله مكياج اجمل
11:20 ص
بسم الله الرحمن الرحيم
اليوم حتكلم عن البشره ماحتكلم كخبيره او طبيبه حتكلم عن كم شغله اعرفها واستفدت منها وحابه تستفيدو منها
طبعا اول سؤال ينسال يوم تبغي تشتري مكياج او غسول او ماسك
ايش نوع بشرتك ؟!
واذا عرفتي جوابهم راح يفيدوكي كثير في اختيار منتجات تفيد بشرتك قبل ماتهتمي من برا لازم تهتمي من الداخل عشان ذا الشي راح ينعكس علي بشرتك وشعرك وجسمك فاول شي واهم شي تشربي مويه كثيرر وذا اهم شي وراح يفرق معاكي وراح تنتبهي انو بشرتك مع شرب المويه سارت احسن وصحيه اكثر وشرب المويه في اليوم يكون من 8الي 9 اكواب باليوم .
ثاني شي الاكل الصحي او حاولي تكوني صحيه ابعدى عن الوجبات الي فيها زيت كثير والحلويات وكثري من الفواكه والخضار وثاالث شي واهم شي النووووم في الليل مو النهار لانو سمعت انو فايدتو اكثر وذولا الاشياء حتفيدك للمدا البعيد يعني حاولي قد ماتقدري تسوينها .
ونبدا بالخارجي اول شي امسكي مرايتك وشوفي عيوب بشرتك وعالجيهم قبل ماتفكري انو تخفيهم ومايبانو لانو لو حاولتي حتزيدي المشكله وتسيرلك مشاكل اكثر فأعالج الحبه ولا اعالج كميه حبوب فشوفي هيا حبوب شباب او اثار حبوب او بقع روحي عيادة جلديه وعالجيهم .
بعد العلاج لا تنسي التنظيف للبشره عشان المشاكل لا ترجع في بعض العيادات الدكتوره حتوصفلك غسول داومي عليه واذا ما وصفولك استشيريها بغسول وخذي الى تقلك عليه واذا كنتي عارفه نوع بشرتك وماعندك مشاكل كبيره راح تحتاجي غسول تستخدميه في الصباح والليل موجوده في الصيدليات واسعارهم جميله .
انا استخدم غسول نيتروجينا لتحكم بلمعان البشره لانو بشرتي مختلطه واتعب في الصيف فكنت استخدمو واستخدمت كلين اند كلير جممميل اذا كنتي جايه من الجامعه او طلعه وتبغي شي ينعشك ذا الغسول راح ينعشك جميلين بس من سلبياته انو ينشف بزياده واهم شي لا تنسي الواقي من الشمس في النهار يوم تطلعي جامعه او طلعه لانو راح يحميلك بشرتك.
استخدم الغسول مع كلاريسونك وقبل كلاريسونك كنت استخدم الغسول مع ذي الاسفنجه من ذا بدي شوب مو قويه وناعمه على البشره وفي انواع كثير خذي الى تحسي بشرتك تتحملها.
وبعد الغسول راح تحتاجي ترطيب والترطيب لجميع انواع البشره لانى اسمع بنات كثير انو انا بشرتي دهنيه خلاص ما ارطب وذا غلط لانو لكل بشره كريماتها انا ارطب بكريم سيتافيل خالى من العطور ومرتاحه عليه وفيه كمان كريم مرطب لبيوديرما كريم جميل خالى من العطور والغسول والمرطب استخدمهم في الليل والنهار واهم شي الترطيب وذولا حاولي تسوينهم يومياً انا عارفه اول شي راح تتحمسي بعدين تنسيهم فحاولي تحطيهم قدام عينك عشان لا تنسي.
وفي كم شغله تسوينهم كل اسبوعين وهيا
تقشير الوجه في مقشرات قويه وفيه ناعمه القويه كل اسبوعين والناعمه انا استخدمهم كل اسبوع اذا كنت محتاجه مقشر ستيفز تقشيرو قوي ما استخدمو يوميا استخدمو كل اسبوعين اما مقشرنيتروجينا بالجريب فروت جميل وتقشيرو خفيف لانو تقشير يومي فاستخدمو اذا كنت محتاجه تقشير خفيف لانو ما احس بشرتي تحتاج تقشير يومي ومقشر من كلرنس تقشير نااعم وجميل ذا سنبل جاء مع بكس لكلرنس.
التقشير لاززم بعد المكياج الثقيل والي تغطيته عاليه لانو دايم التغطيه العاليه شيلته صعبه او المكياج الي جلستي فيه مده طويله والتقشير يفيد في تجدديد البشره وبعد التقشير اذا مانسيت لانو دايم انساها وهيا ارش على وجهي مويه ورد وباارده تحسي وجهك رطب وبعد ماتتشربه البشره ارطبه وتمتعي ببشره ولا اجمل ان شاء الله اكون افدتكم .
0 التعليقات